اسم السجين (اسم الشهرة) : محتجز بقسم شرطة ميت سلسيل
النوع الاجتماعي : ذكر
تاريخ تحرير أو نشر الرسالة : 3/25/2015
السن وقت الاحتجاز: غير معلوم
الوظيفة – نشاط بالمجال العام: –
مكان احتجاز المرسل : قسم شرطة مركز ميت سلسيل
من هنا تبدأ معاناة ميت سلسيل – الجزء الخامس
يبدأ طابور الذنب ويبقي المطلوب مننا كالآتي نصدر أصوات كلاب ويوقفونا قصاد بعض، وكل واحد يضرب اللي قدامه بالألم واللي هيرفض الأوامر يبقي حكم علي نفسه بالإعدام، ممكن مثلاً يطلب منك إنك تعمل نفسك راكب موتسيكل ..
كلها أمور لعب بالنفسية، وممكن يطلب منك إنك تعمل حادثة يعني تجري من بعيد و ترمي نفسك علي الحيطة أو تعمل نفسك بتتكلم في تليفون وهمي، كلها أمور نفسية “.
ثم يُكمل قائلاً “بعدها تأتي لحظة التسكين في الزنازين، أول ما تدخل الزنزانة تنام علي طول لتصبح علي آلام اليوم التالي، مع العلم إن ما ينفعش إن آخين أو أب وابنه أو أي اثنين بينهم صلة قرابة يكونوا مع بعض في زنزانة واحدة،
لتستيقظ في صباح اليوم التالي لتجد نفسك في زنزانة بها كاميرا مراقبة، والمطلوب منك أن تستيقظ الساعة 7 الصبح كل يوم إجباري عشان تطلع الزبالة من الزنزانة، وده عن طريق مخبر هيفتح باب الزنزانة، والمطلوب منك إن أول ما الباب يتفتح في أي وقت تقوم تقف ووشك في الأرض وايدك وراء ظهرك بكل إذلال وخضوع،
بعدها يفتحوا المراوح علينا في عز البرد وممنوع إنك تكون لابس شراب أو ايس كاب أو تكون متغطي ببطانية وممنوع النوم من 7 الصبح إلي 7 مساءً ..”.
“مع كل فتحة باب يبدأ الرعب .. لأنك لازم تنتفض من مكانك ووشك في الأرض ده أساسي وإيدك وراء ظهرك، وتبدأ العد كل واحد يقول رقمه التسلسلي بأعلي صوت عنده … ولو صوتك قل سنة هيتقلك كلمة واحدة بس اقلع هدومك وحصلني علي الساحة وما أدراك ما الساحة ساعتها بأه …”
ثم يضيف “كل يوم في الزنزانة لازم تسمع صوت صراخ وأنات شخص بيتعذب في الساحة، وطبعاً النوم في الزنزانة بيكون بميعاد من 7 العشاء حتى الفجر، وده إجباري وممنوع في وقت النوم ده تكون قاعد أو حتى تدخل الحمام عشان كاميرا المراقبة، ممنوع تقوم من وضع النوم، وطبعاً ممنوع تتغطي ببطانية وأنت نايم وممنوع تصلي قيام ليل،
في موقف حصل مع واحد جنائي كان بيصلي بينا العشاء جماعة ودخل أمين الشرطة وأجبروا علي الطلوع من الصلاة وقال بعد كده النوم هيكون بعد المغرب !