اسم السجين (اسم الشهرة) : محتجز مجهول
النوع الاجتماعي : ذكر
تاريخ تحرير أو نشر الرسالة : 7/15/2019
السن وقت الاحتجاز: غير معلوم
الوظيفة – نشاط بالمجال العام: –
مكان احتجاز المرسل : مكان احتجاز غير معلوم
قصة فرعون
كان ياما كان
كان فيه زمان، قبل التاريخ ما يتكتب..
فرعون بيحكم أرضنا.. يبني في سدود
يصنع قيود.. للمعترض على كلمته
علشان يطول مدته
وتكون بلدنا في قبضته
ولأنه كان مجرم كده
ماقبلش من موسى الهدى
وقاله مش هنصدقك
ولا نسمعك إلا إذا.. جبتلنا آية من السما
والسحرة حضروا بجمعهم.. جاهزين بعدة شغلهم
و ف لحظة أبطل سحرهم
صارت عصاه تعبان كبير
أكل الحبال وعصيهم
السحرة سجدوا وآمنوا بيه.. أول ما شافوا المعجزة
فرهون بكبره قالهم: بتآمنوا ليه؟!
مأمرتكوش.. أنا ربكم، وهتعبدوني كلكم
وأنا عن جدودي ورثتكم
ومتعملوش.. غير اللي كنت أمرت بيه
الكبر أكبر مشكلة
ومصيبة سودة منيلة
فرعون دا أصله كان غبي
فاكر انه راح يغلب نبي
الكل عارف آخرته.. هلك في عز قوته
وجنوده اللي غرته.. مفضلش واحد منهم
بس المهم ف قصته
إن احنا لازم نستفيد
مش كل يوم يطلعلنا.. فرعون جديد
يخرب وينهب في البلاد
ويذل أنفاس العباد
لازم نوحد صفنا
العود لوحده ينكسر.. من غير تعب
لكن إذا جمعتهم.. صاروا شداد
والاتحاد شد العصب
ولا ريح في يوم تهزهم
ضربوا بفرعون المثل
في اللي جرى واللي حصل
سألوه ايه اللي فرعنك؟!
وعملت ايه يمكنك؟!
كان رده جاهز قالهم:
أول ما جيت فرقتهم.. ملقيتش حد يصدني.
