اسم السجين (اسم الشهرة) : محمد السيد (ابو داوود)

النوع الاجتماعي : ذكر

تاريخ تحرير أو نشر الرسالة : 5/20/2016

السن وقت الاحتجاز: 30 عام

الوظيفة – نشاط بالمجال العام: طالب بكلية الإعلام وموظف دعم فني بإحدى شركات الإنترنت – عضو بحركة 6 أبريل

مكان احتجاز المرسل : مكان احتجاز غير معلوم

10 فوائد للاعتقال

10 فوائد للاعتقال :1 – إنك تقابل عم سعيد ( أبو تمانية ) وتتكلم معاه.2 – هتقرأ كتير أوي، وهتقرأ أي حاجة وكل حاجة حتى الكلام اللي مكتوب على علب العصير اللي بتجيلك في الزيارة ( فضى بقى ).3 – هتتعرف على ناس جدعان أوي ( الجنائيين ).4 – اليوم بيعدي هوا، أه والله بيعدي هوا ( أصل نصه نوم ).5 – إنك تقابل عم سعيد ( أبو تمانية ) وتتكلم معاه.6 – هيبقى عندك قدرة فائقة على النوم في حتة نص متر وعرض 30 سم.7 – هتعرف تعمل شماعة ( عصفورة ) تعلق عليها حاجتك.8 – هتتعلم تقلع الجزمة وانت داخل على أي مكان فيه فرش، حتى لو كان الفرش متوسخ من جزم الظباط والأمناء.9 – هيبقى عندك قدرة فائقة للتعامل مع أي بني ادم خلقه ربنا الحرامي والقاتل والنضيف والوسخ والمجنون والعاقل.10 – إنك تقابل عم سعيد ( أبو تمانية ) وتتكلم معاه.وانتوا كمان اوعوا تيأسوا، أنا واللي معايا مستعدين نفضل محبوسين، بس بشرط انتوا تفضلوا تناضلوا من غير يأس.في فوائد كتير تتلخص كلها في المعرفة الكتيرة أوي، أه أنا معتقل بس متفائل، أه أنا معتقل بس ببص لنص الكوباية المليان، أه أنا معتقل بس لسة بضحك وهفضل أضحك، ولسه بقلد في الافلام اللي حافظها وعمري ما يأست ولا هيأس..وعلى فكرة العقوبة جزء من النشاط ده اللي اتعلمته من ماهر وعادل وعمرو ورامي وغيرهم، و ده اللي لازم تكونوا عارفينه، اوعوا تيأسوا لأن فعلًا اليأس خيانة..كملوا لأن إحنا جوة مكملين