اسم السجين (اسم الشهرة) : محمد السيد (ابو داوود)

النوع الاجتماعي : ذكر

تاريخ تحرير أو نشر الرسالة : 7/9/2016

السن وقت الاحتجاز: 30 عام

الوظيفة – نشاط بالمجال العام: طالب بكلية الإعلام وموظف دعم فني بإحدى شركات الإنترنت – عضو بحركة 6 أبريل

مكان احتجاز المرسل : منطقة سجون طرة

رسالة بمناسبة عيد الفطر

كل سنه وانتو طيبينعيد سعيد عليكم و على كل حر فى مصرعيد سعيد على كل اخواتى اللى فى المعتقل و احب اقولهم شده وتزول يا رجالة والى أحنا فيه ده ضريبه الرجوله و الجدعنه و الخوف على البلدالسجن اه وحش بس مش وحش اوى للدرجه يعنى
مثلا السجن هتلاقيه بيظهر النفوس و ينضفها
وربنا علشان بيحبنا ابتلانا بالسجن تكفير ذنوب يعنى
انا عن نفسى ذنوبى كتير فالحمدلله على كل شئ.
وبعدين هى مش فارقه كتير من اوضه فيها 25 فرد لاوضه فيها 90 مليون فرد … ده سجن و ده سجن و احنا الحمدلله حبستنا جت بفايدة حكم المحكمه بس يارب تكمل على خير والطعن يجى لصالحنا اقصد لصالح البلد ان شاء الله
فيه رساله تانيه احب اقولها لاى حد زعلان منى سواء انا زعلته بقصد او من غير قصد انا اسف جدا جدا لو حصل منى حاجة تزعلكم و اهو الحمدلله امن الدوله خدلكم حقكم 😀
فياريت ده يشفعلى عندكم و تسامحونى
رساله تانيه لكل شخص واقف معايا او مع اى حد معتقل مهما قولت شكرا ليكم عمرى ما هوفى حقكم لولا وجدكم جنبنا عمرنا ما كنا هنستحمل السجن
شكرا جداااا جداااا
اخر رساله لابويا و امى
ربنا يخليكم ليا و انا اسف انى تاعبكم معايا بس اقسم بالله لهفضل رافع راسكم ديما و تفضلوا فخورين بابنكم
اسف لو طولت عليكم و كل سنه و انتوا طيبين تانى و ان شاء الله العيد الجاى نشوف بلدنا احسن بلد فى الدنيا.
محمد ابو داوود