اسم السجين (اسم الشهرة) : محمد عبد الله

النوع الاجتماعي : ذكر

تاريخ تحرير أو نشر الرسالة : 5/23/2016

السن وقت الاحتجاز: غير معلوم

الوظيفة – نشاط بالمجال العام: –

مكان احتجاز المرسل : منطقة سجون طرة

ابنتي الحبيبة وحشتيني قوي

ابنتي الحبيبة وحشتيني قوي أول مرة متجوليش زيارة كنت قلقان جداً لما عرفت انكو تعبانين أنا اسف ليكو علي تعبكو معايا غصب عني كان نفسي أريحكو ادعولي اخرج بسرعه علشان أعوضكو عن كل لحظة تعب ليكو ….. أول لما خرجت الزيارة ولقيت أختي وأمي فرحت جدا لكن زعلت جوايا علشان مشفتكوش ولما سألت عليكو عرفت أنك تعبانة زعلت قوي ودخلت الزنزانة وانا زعلان صحابي سألوني مالك مرتدتش عليهم وقررت اني ادخل في *صمت*ومتكلمتش مع حر وفضلت أسال نفسي يا تري كل ده بيحصلي ليه. ليه أنا محروم من زوجتي وبنتي ليه انا مش عارف افرح ببنتي ساعات بقول لنفسي ياريتني مكنت اتجوزت ولا خلفت حاسس ان فين ناس فارقيني ملهمش ذنب متبهدلين بسببي مبيفرحوش بسببي أيامهم كلها أسود بسببي فرحتهم مبتجيش ….. لكن والله هما دول اللي مصبرني ومقويني ان ان اشاء الله فرجه قريب وبين كل غمضة عين والتانية ألف فرج …. جويرية خرجت للدنيا بلا (أب) جويرية أيامها وأعيادها وفرحتها ولعبها وخروجها في السجن …!
أول مرة أسمع من جويرية كلمة بابا.. جويرية لما اديتها الفانوس فرحت أوي و مسكت ايدي و قالتلي “أنا بحبك يا بابا، يلا تعالى”..
و الله العظيم و الله دموعي نزلت مني.. أول مرة أسمع كلمة بابا.. و أول مره تحضني و تبوسني.. أول مرة أفرح و أنا في السجن! لما الزيارة خلصت و جويرية و مامتها مشيت.. و دخلونا “التقفيصة” و جويرية مسكت ايدي من بين الحديد و قالتلي “تعالى يا بابا هنجيب زبادي من عند عمو سيد” استغربت ليه بتقولي كده.. ف سألت زوجتي “هي ليه بتقول كده؟” قالتلي “عشان كل ما تسأل عليك أقولها “بابا في الشغل بيجيب زبادي ل جوري” أنا هموت على بنتي.. جويرية بتكبر كل يوم.. و أنا بموت كل يوم! أنا أسف ليكي يا جوري