اسم السجين (اسم الشهرة) : محمود طلعت (طمطم)

النوع الاجتماعي : ذكر

تاريخ تحرير أو نشر الرسالة : 9/5/2016

السن وقت الاحتجاز: غير معلوم

الوظيفة – نشاط بالمجال العام: –

مكان احتجاز المرسل : قسم شرطة كرموز

مساء الخير وحشتونى كلكم 

مساء الخير وحشتونى كلكم اتمنى تكونوا بخير وأمل ان تكونوا لسه فاكرين قضيتنا
السجن شئ بشع ممل غير مفيد بالمره هو فعليا التوصيف الحقيقى لجملة الموت بالبطئ
خليكم مدركين بأن القعده هنا بتسرق كل الاحداث والانفعالات اللى من الاكيد كنت هعملها لو بره ولازم تكونوا متأكدين بأن مقدار التضحيه اللى بنعملها بوجودنا هنا اقل بكتير من قيمتنا واحنا بره على الاقل كنا هندعوا الناس لافكارنا
هنا احنا فعلا مقيدين الحرية الحركه بحساب الكلمه بحساب والتفكير بحساب ومعرضون يوميا لمثلا التفتيش وان كل ممتلكتنا تهدر النوم بميعاد الصحيان بميعاد الحمام بميعاد بنجبر على ممارسه افعال بنشوف مرتكبيها مجرمين زى الرشوه والكدب والنفاق فى التعامل مع الامن وده بيكون بشكل دورى
بالاضافه للأحتقان اللى بيكون بين الزملا المعتقلين وبعضهم اللى بيترجم فى اغلب الاوقات لصراع ممكن يوصل لعزله او ان احد الزملا يقرر يعيش منفرد وده أسوء شئ بيمر بيه حد فى السجن والاحتقان ده نتيجه طبيعيه لملل الشكل المعيشى الروتينى هنا وطبيعى جدا فتخيلوا 40 فرد بيعيشوا فى اوضه اقل من 35 متر بياكلوا ويشربوا ويتكلموا ويقروا ويكتبوا ويتعاركوا ويتصالحوا ويصلوا ويناموا ..الخ واكتر من كده من انفعلات بيمارسوها سوا ومفيش جديد
بغص النظر عن التوصيف اللى معتقدش بأن حد فاقده عن السجن ومساوئه لكن اكبر خساره بنمر بيها هى الخساره المعنويه الضغوطات النفسيه الشعور الدايم بالحسره وخيبة الامل مع كل تجديد وكل رفض استئناف
التفكير فى المستقبل اللى دايما بشوفه معتم من الاخر السجن مش للجدعان ولا هو مصنع الرجال السجن مركز للامراض النفسيه والعصبيه وخلق المتطرفيين والارهابيين الحقيقيين
ادعولى كتير انى اخرج من هنا لانى فعلا مليت ولان امى وحشتنى ولان الحريه جميله فتمتعوا بيها قبل ما تخسروها فى لحظه بتهمة التفكير
محمود طلعت من سجن كرموز العمومى الاثنين 5-9-2016