اسم السجين (اسم الشهرة) : مصطفي احمد

النوع الاجتماعي : ذكر

تاريخ تحرير أو نشر الرسالة : 6/2/2014

السن وقت الاحتجاز: غير معلوم

الوظيفة – نشاط بالمجال العام: –

مكان احتجاز المرسل : منطقة سجون أبو زعبل

أموات بروح داخل مقابر السجون

أموات بروح داخل مقابر السجون أننى أعيش فى زنزانة مساحتها 6 أمتار × 5 أمتار بالحمام..ومن غير الحمام 6 أمتار × 3.5 متر .. وعددنا بداخل الزنزانة 22 معتقل!! عارفين يعنى إيه 22 شخص يعيشوا فى زنزانة بالحجم ده؟!! عارفين كمية الأمراض اللى بتجيلنا تحت دراجة حرارة تتراوح ما بين 37 درجة و39 درجة تقريبا..ده غير النفس وعدم التهوية!! ده لو أسرة مكونة من 6 أشخاص مبتعرفش تعيش فى شقة حجمها 80 متر!! الزنزانة مواعيد المياه فيها من 8 : 10 صباحاً و 4 : 5 عصراً و 7 : 9 مساءاً!! .. يعني المياه بتيجى فى اليوم 5 ساعات بس من أصل 24 ساعة..يعنى المياه مقطوعة فى اليوم 19 ساعة..ومبنعرفش ندخل الحمام بسبب التزاحم عليه..غير ده كله المياه ملوثة لا تصلح للإستخدام..أو الاستحمام حتى!!* ده غير إننا بنملأ زجاجات مياه ونخليها داخل الحمامات لغسيل الوجه..وبنغسل الاكل منها كمان!! زنزانة لايوجد بها أى “ارفف” لنضع عليها الطعام..ونضطر لوضع الطعام بجانب الحمام عشان نعرف ننام!!..وبرضه مبنعرفش ننام لأن إحنا متكبسين فوق بعضنا!!. وشنط الملابس بنربطها بأحبال فى الحائط..وتسمى “عصفورة” وبيتجمع عليها الحشرات والصراصير..ده غير أحبال الغسيل فوق رؤوسنا مربوطة من شباك الزنزانة إلى شباك الحمام. “أننى أعيش فى مقبرة بلا ضوء ولا هواء” مواعيد التريض ساعة واحدة فقط فى اليوم..وبنخرج 5 أيام فى الاسبوع..بنخرج فى طرقة عرضها متر واحد فى إمتداد طول 7 زنازين..يعنى مش بنشوف الشمس!..يعنى 23 ساعة فى الزنزانة نَفسنا فى نَفس بعض ومفيش تهوية!!. الزنزانة بيدخلها وجبتين فى اليوم : الفطار :- عبارة عن فول بس مش فول بنى أدمين! للأسف فول “بهايم” “علف” وبناكل فول ملوش طعم! الغداء :- كل يوم أرز بالحصو بتاعه!! وخضار مطبوخ بقشره ومش بعيد يكون بالطين بتاعه!! ويوم الأثنين والخميس “لحمة” بس عبارة عن قطعة “كوتش” مبتتكلش وكل واحد له 3 أرغفة فى اليوم ميتكلوش!!* أما بقى الزيارة مدتها 10 دقائق فقط فى الزيارة بتعامل معاملة سيئة من الظباط والامناء..والمخبرين بيجبرونى أن أجلس وسط الجنائيين بجوار السارقين والقتلة وتجار المخدرات! ده غير انتهاك العرض “التحرش الجنسي” والتعذيب البدنى والتفتيش السئ! “إنهم يتعاملون معى كعدو لهم!” ولو حد عارض كل ده يتعمله “محضر تأديب”!! زى ما حصل معايا ومع غيرى كتير محضر التأديب عبارة عن حبس إنفرادى 72 ساعة داخل زنزانة متر × متر ونصف بداخلها حمام..مبيدخلكش غير رغيف الصبح ورغيف بالليل!!..وممكن ميدخلكش غير رغيف واحد بس!! “وبعد اللى بيحصلى ده كله..مش عارف إيه ممكن يحصل تانى” “بس أنا مش هطاطى..لأن مفيش رجوع” مرفق بالرسالة صورة لرغيف العيش الذى يتم توزيعه على المعتقلين بسجن أبوزعبل والمياه الملوثة. سجن أبوزعبل ليمان 1 2 يونيو