اسم السجين (اسم الشهرة) : ممدوح جمال الدين حسن عبد الوهاب (ممدوح جمال)

النوع الاجتماعي : ذكر

تاريخ تحرير أو نشر الرسالة : 12/19/2014

السن وقت الاحتجاز: 18 عام

الوظيفة – نشاط بالمجال العام: طالب بكلية الحقوق بجامعة بنها

مكان احتجاز المرسل : منطقة سجون طرة

بلاغاً للنائب العام وشكوى إلى المجلس القومى لحقوق الإنسان

هذه المرة لن اكتب مقالا اشرح فيه معاناتى داخل سجن “القاهرة طرة تحقيق” ولن اكتب رسالة أحث فيها الحالمين بالتغيير على الصمود والثبات على مبادئهم كعادتى.
هذه المرة أكتب بلاغاً للنائب العام وشكوى إلى المجلس القومى لحقوق الإنسان وإلى كل من يهتم بكرامة الانسان.
سيقتصر دورى على الكتابة فقط وسأترككم مع زميل الزنزانة “حسـن” يسرد لكم شكوته:
ـــــــــــــــــــــــــــــــــــــــــــــــــــــــــــــــــــــــــــــــ
-انا حسن على احمد عندى 29 سنة وخريج دبلوم تجارة
-اترحلت من قسم شرطة البساتين لسجن القاهرة طرة تحقيق فى يوم 12-10-2012، وانا داخل السجن عرفت ان فى توصية عليا من:
-رئيس مباحث قسم شرطة البساتين “خالد عبد المنعم الدمرداش”
-رئيس مباحث سجن طرة تحقيق “احمد اسماعيل”
-معاون اول مباحث سجن طرة ” اشرف خفاجة ”
أعطوا أوامر للمخبرين اللى فى السجن بتعذيبى وتعدوا عليا بالضرب ودراعى الشمال إتكسر من كتر الضرب وكمان هتكوا عرضى وسببولى شرخ فى فتحة الشرج .
– انا محبوس فى عنبر 1 شديد الحراسة وفى مخبر اسمه “صبرى” عذبنى اكتر من مرة ولما سألته انت بتعمل ليه كدة معايا، قالى عشان انت مجرم رديت عليه وقولتله انا مش مدان ولسه القضاء محكمش عليا..
قالى انا ماليش دعوة بالقضاء وانا عندى اوامر انى اعذبك قولتله طيب كفاية انا بموت ودراعى مكسور قالى لو مش عايز تضرب كل زيارة تجيب لى 500 ج , وطبعا مكانش قدامى غير كدة وكل زيارة كنت باخد من اهلى 500 ج واديهم للمخبرين وهما (صيرى – سيد عبد العاطى – النجار – الشحات).
ولما ظروف اهلى المادية ضعفت بسبب وفاة والدى ومش معايا فلوس اديها للمخبرين رجعوا يعذبونى وهتكوا عرضى تانى وشربونى تركيبة ودى عبارة عن (مياه, زيت, ملح, رابسو, لبن, حلاوة, تبغ سجاير) ودى بتخلينا نرجع على طول وممكن نفضل يومين نرجع وفى ناس كتير من الجنائيين ماتوا من كتر الترجيع زى:
1- حسين عربى: تاريخ وفاته مارس 2013 زانزانة 11 أ – 26 سنة
2- احمد جمال: تاريخ وفاته مايو 2013 زنزانة 8 ب – 27 سنة
3- احمد كشرى: تاريخ وفاته نوفمبر 2014 زنزانة – 30 سنة
وجميع المذكور اسمائهم فى عنبر 1 شديد الحراسة
-وطبعا محدش بيسمع حاجة عن الناس دى، واللى بيتكلم بيموت زيهم وفى الاخر بيتكتب هبوط حاد فى الدورة الدموية، فى ناس كتير ماتت بس دول اللى فاكر اسمائهم.
الترجيع دة طريق من ضمن طرق كتير وفى بقى حاجة اسمها “المنور” ده مكان فى عنبر 1 شديد الحراسة بينتهكوا فى عرضنا ويقلعونا اللبس وبيكون معاهم مواسير مياه وخراطيم وينتهكوا بيها عرضنا واللى عايز يفلت يدفع فلوس للمخبرين.
-الزيارة بقى لازم ادفع فلوس للمخبرين ولو مش معايا الزيارة تتعدم والاكل يترمى فى الزبالة قدام عيونى وكل ده بيحصل مع الجنائيين وبعلم المباحث وادارة السجن.
– انا هنا بقالى 4 سنين ماشوفتش حد من حقوق الإنسان اللى بيتكلموا عليها دى ولا حتى أى مسئول ولما بسمع انهم موجودين فى السجن مش بشوفهم ولما بسأل بعرف أنهم قاعدين فى مكاتب الظباط ولما بيحصل تفتيش إدارة السجن بتجيب جنائيين تبعها عشان يعرضوهم على المسئول.
-كمان فى حاجة اسمها “الدواعى” عبارة عن زنزانتين 5 ب – 6 ب فى عنبر 1 شديد الحراسة ودول بيعذبونا فيهم وبنقلع كل هدومنا وعددنا بيكون من 25 لـ 35 جنائى والمخبرين بيدخلوا يدلقوا المياه علينا فى عز الشتاء وبيضربونا بسلك الكهرباء وبيفلكونا وبيمدونا على الرجلين وبيعلقونا من كتفنا عريانبن ويقضلوا يضحكوا علينا وكمان المخبر “صبرى” بيستخدم المسجد بتاع العنبر عشان يعذبنا فيه ولما ييجى تفتيش الإدارة بتخرجنا من الدواعى وبعد كدة بترجعنا تانى.
-انا عايز اقول نفسى حد مسئول ييجى العنبر ويشوف بعنيه اللى بيحصل انا مش عايز اموت من التعذيب وعايز أخد حقى واتعامل بكرامة ولو غلط اتحاسب بالقانون.
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
هذه نص رسالة “حسن” إلى كل من يهتم بالكرامة الإنسانية، قمت بواجبى تجاه ضميرى ونقلت لكم إستغاثة وعليكم بالفعل والتحرك لوقف هذه الكارثة والإهانة داخل سجن طرة تحقيق.
سجن القاهرة – طرة تحقيق
عنبر 1شديد الحراسة
زنزانة 16 ب