اسم السجين (اسم الشهرة) : ياسر السيد محمد عوض (ياسر عوض)
النوع الاجتماعي : ذكر
تاريخ تحرير أو نشر الرسالة : 5/16/2014
السن وقت الاحتجاز: غير معلوم
الوظيفة – نشاط بالمجال العام: طالب بكلية الصيدلة بجامعة المنصورة
مكان احتجاز المرسل : سجن المنصورة العمومي
حساب
كان في نكتة قديمة بتحكي عن واحد راح المعتقل فلقى واحد قديم هناك ..فالراجل القديم سأله ..هو عبد الناصر مات ؟؟ فالجديد فِضل يَخبط على باب الزنزانة ..عاوز يخرج قبل ما ينسى اسمه !!
_كانوا اللي بيروح مبيرجعش ..محدش بيسمع عنهم ولا يقدر يوصلهم ..كانوا فعلا ..اللي بعيد عن العين بعيد عن الخاطر..كانوا بيستنوا ؟؟يمكن فيه زيهم دلوقتي !!
_من الأسباب اللي بتخليني أحاول كل شوية يكون لي كلمة تتسمع ..,ولو كانت حتى مجرد خواطر زنزانة ملهاش أي قيمة عند حد ..إن صورة بره متختفيش من دماغي ..لأني مش هأرضى ! إني أختفي مالحياة فجأة بعد ما كانت الحياة بين إيدي ..بس عمري ما تخيلت إنها توصل وبسرعة كدا إني كنت حاجة وخلصت ..وإني اختفيت مع إني موجود !
مكنتش متخيل إن ده ممكن يخطر على بال أي حد..ولو كانت مجرد فكرة !
_ سمعت عن ال fun day وحفلة التخرج ..كنت بأحلم بالمفآجات من دفعة المفآجات ..(( على الرغم ان بيتم العمل بجدية وبخطوات ثابتة إني متخرجش في دفعتي ..بس هحاول أتغاضى عن ما هو واضح وأبطل سوء ظن ))
أتخرج مع الناس اللي عشت معاهم في سنين الكلية أكتر ما كنت مع أهلي …
ودي حاجة حقيقية مش مُبالغ فيها !!
_إفتكرت اللي كانوا وسط زمايلهم مبيسيبهومش …واتخطفوا من وسط زمايلهم وهم بيتفرجوا ..!!
_افتكرت اليوم اللي كان مجمع الدفعة كلها من سنة فاتت ..وفاكر كل واحد رسم ضحكة أو شال الحزن من جوه زمايله ..هم دلوقتي بعيييييييييييييييييييد ..وفيه اللي لسه مبسوط وفرحان !!
_افتكرت جروب الدفعة ..نتخانق ونتصالح..نزعل ونفرح بس ..ما افتكرتش ان عمر حد فينا باع حد ولا غدر بيه ..متستغربش من الكلمة ..شديدة وقاسية ..بس فعلا مش لاقي وصف تاني ..
_علي أي حال كلامي مش عتاب ..مجرد سرد واقع ..وكل واحد يعرف مقامه وأصله ..كل واحد يعرف قيمته في الدنيا ..
_كلامي عشان أعرف اللي مابعش ماللي باع ..اللي كسبناهم واللي خسرونا ..
_يكفيني من المحنة إني عرفت مين من زمايلي رجالة وقت الشدة وإني كنت قصرت في حقهم ..
إني اللي كانوا زمايل وخسرونا ..ربنا عوضننا عنهم بناس عشنا معاهم المُرة قبل الحلوة ..استحملنا بعض في مواقف يمكن لو كان شقيقي مكنش استحملني ولا استحمل صعوبتها وكله خير ..وقدر الله خير ..وحُسن الظن بالله قبل أي شيئ ربنا هيعوضنا بأيام أحسن ماللي فاتتنا ..
_ربنا هيعوضنا بحفلة تخرج أحسن ..ويكون الكل موجود فيها ومحدش غايب ..وزمايلنا اللي احنا في صفهم وهما في صفنا ربنا يثبتهم ويرزقنا الفرحة …واللي غدر واللي باع واللي نسي واللي خان العيش والملح ..هيجيله يوم ساعتها ميتمناش حاجة أحسن ماللي عمله ..!!
#الظلم_مبيتحكاش !
